Bakının mərkəzində tıxacları azaldacaq yeni həll yolu

Abşeron dəmir yolu xəttində sərnişin sayının artması, şəhər daxilində mövcud stansiyaların yükünün daha səmərəli şəkildə bölüşdürülməsi məsələsini yenidən gündəmə gətirib. Hazırda sərnişin axını əsasən Bakı Sərnişin stansiyası və 28 May üzərində cəmləşir ki, bu da uzunmüddətli perspektivdə optimal yanaşma sayılmır.

Minval.info xəbər verir ki, nəqliyyat eksperti Rauf Ağamirzəyev Keşlə stansiyasının şəhərdaxili alternativ sərnişin qovşağı kimi inkişaf etdirilməsi məsələsini gündəmə gətirib. Onun sözlərinə görə, Keşlənin əlverişli coğrafi mövqeyi, Nərimanov, Bakmil, Dərnəgül və Ulduz istiqamətlərinə çıxış imkanları ilə böyük potensiala malikdir.

Ekspertin fikrincə, Keşlədə yalnız dəmir yolu dayanacağı deyil, həm də şəhər avtobusları, metro, piyada və mikromobillik imkanlarını birləşdirən Nəqliyyat Mübadilə Mərkəzi yaradılmalıdır. Bu, sərnişinlərin müxtəlif istiqamətlərə daha rahat çıxışını təmin edəcək.

ƏLAQƏLİ

Bunu da oxu

Parlamentdə radikal qruplara qarşı sərt tədbirlər təklif edildi

30.09.2026 - 13:20

Ağamirzəyev əlavə edib ki, dəmir yolunun altından təhlükəsiz və birbaşa piyada keçidinin yaradılması, Keşlə stansiyasının ətraf ərazilərlə əlaqəsini əhəmiyyətli dərəcədə yaxşılaşdıra bilər. Onun sözlərinə görə, Bakı Sərnişin stansiyasından sonra Keşlə şəhər daxilində sərnişin qovşağı kimi ən böyük potensiala malik məntəqələrdən biridir.

Ekspert qeyd edir ki, Abşeron xəttində hərəkət edən qatarların Keşlədə dayanmasının təmin edilməsi, sərnişin axınının bölüşdürülməsinə və 28 May stansiyasının üzərindəki yükün azalmasına şərait yarada bilər. Bu, şəhər daxilində nəqliyyatın səmərəliliyini artırmaqla yanaşı, insanların təyinat məntəqələrinə daha yaxın nöqtələrdən dəmir yolundan istifadə etməsini təmin edəcək.