“Bir qazinin maddi ehtiyac ucbatından canına qəsd etməsi cəmiyyət üçün ciddi siqnal olmalıdır. Sosial dəstək proqramları, vergi güzətləri tətbiq olunmalı, qazilərin məvacibləri artırılmalıdır”.

Bunu Bakupost.az -a açıqlamasında hərbi analitik Alp Arslan İmamqulu deyib.

O, şəhid ailələri, qazilər və Silahlı Qüvvələrdə xidmət etmiş şəxslərə qayğı göstərilməsinin vacibliyini vurğulayıb və məmurların iş prinsipi barədə də danışıb:

“İcra hakimiyyətlərində fəaliyyət göstərən məmurların çoxu cəmiyyətdə sevilməyən şəxslərdir. Buna səbəb insanların müraciətlərinə ciddi yanaşmamaq, vəzifə səlahiyyətlərini düzgün yerinə yetirməməkdir. Ölkə rəhbəri də bildirib ki, hər bir məmur Azərbaycan xalqının xidmətçisidir. Məmurlar bunun fərqində deyil. Təəssüf ki, bəzi məmurlar xalqa deyil, özlərinə xidmət edirlər. Şəxsi büdcələrini artırmaqdan başqa bir şey düşünmürlər”.