Avropada yeni sərhəd sistemi təxirə salındı

Avropa İttifaqının mübahisəli giriş-çıxış sistemi (EES) ilə bağlı yeni qərar qəbul edilib. Fransa, Belçika, Niderland, Almaniya, Yunanıstan, Malta, Portuqaliya, İtaliya və İsveçrə bu sistemi təxirə salmaq qərarına gəliblər. Bu qərarın əsas səbəbi hava limanlarında yaranan uzun növbələr və texniki problemlərdir.

Minval.info xəbər verir ki, EES sistemi Aİ-yə üzv olmayan ölkələrin vətəndaşlarının sərhəddən keçərkən barmaq izlərinin götürülməsini və üzlərinin skan edilməsini nəzərdə tutur. Sistem ötən ilin oktyabrında mərhələli şəkildə tətbiq olunmağa başlayıb və aprelin sonunadək tam qüvvəyə minməsi planlaşdırılıb. Lakin yay aylarında səyahət xaosunun qarşısını almaq üçün ölkələrə sərhəd yoxlamalarını müvəqqəti dayandırmağa imkan verən 150 günlük müddət müəyyənləşdirilib. Bu müddət sentyabrın 6-da başa çatsa da, qeyd olunan 9 ölkə texniki sistemlər tam işlək vəziyyətə gətirilənədək EES yoxlamalarını tətbiq etməyəcəyini açıqlayıb.

Aviaşirkətlər və hava limanları da yeni sərhəd sisteminin tətbiqinə görə Avropa İttifaqını tənqid ediblər. “Ryanair” aviaşirkəti EES-dən azadolma müddətinin ən azı 2027-ci ilin aprelinədək uzadılmasına çağırıb. Şirkətin əməliyyat direktoru Nil MakMahon prosesin əvvəldən sona qədər uğursuz təşkil edildiyini və əvvəlcədən edilən xəbərdarlıqların nəzərə alınmadığını bildirib.