Avropa Komissiyası Ermənistanla vizasız rejimi təxirə salır

Avropa Komissiyası Ermənistanla vizasız rejimin tətbiqi üçün hələlik konkret tarix açıqlamayıb. Bu barədə Avropa Komissiyasının rəsmi nümayəndəsi Paula Pinyo Brüsseldə keçirilən brifinqdə məlumat verib.

Minval.info xəbər verir ki, Paula Pinyo, 2029-cu ilin viza rejiminin liberallaşdırılması üçün uyğun bir zaman olub-olmayacağını öncədən müəyyənləşdirməyin çox erkən olduğunu bildirib. O, bu məsələnin dəqiqləşdirilməsi üçün hələ vaxtın olduğunu vurğulayıb.

Qeyd edək ki, Ermənistan və Avropa İttifaqı arasında viza rejiminin liberallaşdırılması üzrə dialoq 2024-cü ilin sentyabrında başlayıb. 2026-cı ildə Avropa Komissiyası İrəvana Viza Liberallaşdırılması üzrə Fəaliyyət Planına aid sənəd təqdim edib. Bu sənəd biometrik sənədlərin təhlükəsizliyi, sərhəd və miqrasiya idarəetməsi, ictimai asayişin təmin edilməsi və cinayətkarlıqla mübarizə, insan hüquqlarının müdafiəsi kimi məsələləri əhatə edən 74 bənddən ibarətdir. Ermənistan hakimiyyəti isə vizasız rejimin 2028-ci və ya 2029-cu ildə tətbiqinin mümkünlüyünü açıqlayıb.