Almaniyada 158 illik pivə zavodu fəaliyyətini dayandırır

Almaniyanın Aşağı Saksoniya federal torpağında yerləşən Bergbräu pivə zavodu, 158 illik fəaliyyətini başa vuraraq sentyabr ayının sonunda işini dayandıracaq.

Minval.info xəbər verir ki, bu barədə “NDR” televiziyası məlumat yayıb. Məlumata əsasən, müəssisə bazardakı qiymət təzyiqi, xammal, qablaşdırma, enerji və işçi qüvvəsi xərclərinin artması səbəbindən rentabelliyini itirib. İstehsal sentyabrın 30-da dayandırılacaq, son pivə partiyası isə oktyabrın sonuna qədər satışda olacaq.

Qeyd edək ki, zavodun bağlanması nəticəsində 16 əməkdaş işini itirəcək. Uslar şəhərinin meri Torsten Bauer, Bergbräu zavodunu şəhərin tarixinin ayrılmaz bir hissəsi kimi qiymətləndirərək, yerli hakimiyyət orqanlarının Aşağı Saksoniyanın İqtisadiyyat Nazirliyinə müraciət edərək pivə zavoduna dəstək imkanlarını araşdırmağı xahiş etdiyini bildirib.