ABŞ SEPAH katerlərini raketlərlə məhv etdi

ABŞ Hərbi Dəniz Qüvvələrinə aid pilotsuz dəniz aparatını ələ keçirməyə çalışan İran İslam İnqilabı Keşikçiləri Korpusunun (SEPAH) iki kateri ABŞ hərbçiləri tərəfindən raket zərbəsi ilə məhv edilib.

Minval.info xəbər verir ki, bu hadisə ABŞ Silahlı Qüvvələrinin Mərkəzi Komandanlığının (CENTCOM) nümayəndəsi kapitan Tim Hokins tərəfindən təsdiqlənib. Hokins bildirib ki, İranın kiçik gəmiləri ABŞ dronunu ələ keçirməyə cəhd etsə də, CENTCOM-un qətiyyətli cavabı nəticəsində bu niyyət baş tutmayıb və aparat tam nəzarətdə saxlanılıb.

İran mediası isə fərqli iddialar irəli sürərək, vurulan gəmilərin balıqçı qayıqları olduğunu və bir neçə balıqçının itkin düşdüyünü qeyd edib. Hadisədən sonra ABŞ rəsmiləri, Hərbi Dəniz Qüvvələrinə aid gəmilərin Hörmüz boğazından keçən tankerləri artıq gündüz vaxtlarında da müşayiət etməyə başladığını vurğulayıb.