Abidələrimizə qarşı vandalizm: 68-i tamamilə dağıdılıb

Azərbaycanın işğaldan azad edilmiş ərazilərində tarixi və dini abidələrin vəziyyəti ilə bağlı narahatedici məlumatlar açıqlanıb. Bu ərazilərdə 68 abidə tamamilə dağıdılıb, 114 abidə isə müxtəlif miqyasda dağıntılara məruz qalıb.

Minval.info xəbər verir ki, Azərbaycan Mədəniyyət Nazirinin müavini Səadət Yusifova “Tarixi-dini abidələrin mühafizəsi: çağırışlar və perspektivlər” konfransında bu barədə danışıb. O bildirib ki, minalanmış ərazilərdə yerləşən 130 abidənin inventarlaşdırılması hələ başa çatmayıb. Təhlillər göstərir ki, digər abidələrə də zərər vurulub, onların tarixi mənsubiyyətinin mənimsənilməsi və saxtalaşdırılması halları, həmçinin vandalizm aktları qeydə alınıb.

İslam dini abidələri də genişmiqyaslı dağıntıya və təhqirə məruz qalıb. Belə ki, işğaldan azad edilmiş ərazilərdə 9 məqbərə, 3 qəbiristanlıq və 7 məscid tamamilə dağıdılıb. Daha 25 məscid, 14 məqbərə və 2 dini obyekt müxtəlif miqyasda dağıntılara məruz qalıb. Xristian dini irsinə aid obyektlər də vandalizm aktlarının qurbanı olub. Məsələn, Qubadlı rayonunda iki məbəd işğalçı qüvvələr tərəfindən döyüş mövqeyi kimi istifadə edilib. Bir sıra abidələrin divarlarında kiril əlifbası ilə müxtəlif yazılar və ifadələr də aşkarlanıb.