33 rayonda müasir kəsim məntəqələri qurulacaq

Aparılan monitorinqlər nəticəsində məlum olub ki, Azərbaycanın 33 rayon və şəhərində heyvan kəsimi məntəqələri ya mövcud deyil, ya da fəaliyyət göstərmir. 2018-ci ildə ölkədə cəmi 6-10 kəsim məntəqəsi fəaliyyət göstərirdisə, hazırda bu rəqəm 84-ə çatıb.

Minval.info xəbər verir ki, Azərbaycan Qida Təhlükəsizliyi Agentliyi (AQTA) müasir heyvan kəsimi məntəqələrinin fəaliyyətinin yalnız qanunvericiliyin tələblərinə uyğun təşkilinə deyil, həm də heyvanların identifikasiyası və izlənməsi sisteminin effektiv tətbiqinə, baytarlıq nəzarətinin gücləndirilməsinə və qanunsuz heyvan kəsimi hallarının qarşısının alınmasına imkan verdiyini vurğulayıb.

AQTA sahibkarları kəsim məntəqəsi olmayan rayon və şəhərlərdə müasir tələblərə, baytarlıq-sanitariya və sanitariya-gigiyena normalarına cavab verən heyvan kəsimi məntəqələrinin qurulmasına və fəaliyyətinin təşkilinə dəvət edir. Agentlik bu istiqamətdə sahibkarlara lazımi metodiki, təşkilati və texniki dəstəyi göstərməyə hazır olduğunu bildirib.