Xulian Alvarezin “Barselona”ya keçidi təsdiqləndi

Xulian Alvarezin "Barselona"ya keçidi təsdiqləndi

Argentinalı hücumçu Xulian Alvarezin “Barselona”ya keçidi ilə bağlı maraqlı iddialar ortaya çıxıb. İspaniyanın “El Chiringuito” nəşrinin jurnalisti Jota Jordinin məlumatına görə, Madridin “Atletiko” klubu 26 yaşlı futbolçunun Kataloniya təmsilçisinə transferinə yazılı şəkildə razılıq verib.

Minval.info xəbər verir ki, “Atletiko” klubu Alvarezin “Barselona”ya keçidini təsdiqləyən sənədi futbolçuya təqdim edib. Xatırladaq ki, Xulian Alvarez 2024-cü ilin yayında “Mançester Siti”dən “Atletiko”ya 75 milyon avro qarşılığında transfer olunmuşdu. Müqavilədə əlavə 20 milyon avroya qədər bonusların da nəzərdə tutulduğu bildirilir.

Alvarezin “Atletiko” ilə müqaviləsi 2030-cu ilin yayına qədər qüvvədədir. Ötən mövsüm Madrid klubunun heyətində 49 oyuna çıxan hücumçu 20 qol vurub və 9 məhsuldar ötürmə edib. Lakin yeni mövsümə uğursuz başlayan Alvarez indiyədək yalnız bir matçda meydana çıxıb və qol vura bilməyib.