Skuter sürücüləri piyadalar üçün təhlükə yaradır

Baş Dövlət Yol Polisi İdarəsinin şöbə rəisi Rövşən Tağıyev skuter sürücülərinin piyadaların hərəkətinə maneə yaratmasının yolverilməz olduğunu bildirib. O, skuter istifadəçilərinin təhlükəsizlik qaydalarına riayət etməməsinin ciddi təhlükələrə səbəb olduğunu vurğulayıb.

Minval.info xəbər verir ki, Rövşən Tağıyev skuterlərin nəqliyyat vasitəsi olduğunu və onları idarə edən şəxslərin yol hərəkəti qaydalarına əməl etməli olduğunu qeyd edib. O, avqustun 22-də Yasamal rayonunda baş verən hadisəni xatırladaraq, skuter sürücüsünün ehtiyatsızlığının ağır nəticələrə səbəb olduğunu bildirib.

Şöbə rəisi əlavə edib ki, skuterlərin yalnız yolun sağ kənar zolağı ilə hərəkətinə icazə verilir və avtomagistrallarda hərəkət qadağandır. İki nəfərin bir skuterdə hərəkət etməsi təhlükə yaradır və piyadaların arasında sürətlə hərəkət etmək xüsusilə uşaqlar və yaşlılar üçün risklidir. O, həmçinin valideynlərin azyaşlıların elektrik skuterlərindən istifadəsinə diqqət etməli olduğunu vurğulayıb.