“Şamaxı”nın məşqçisi: “Qarabağ”la oyun dərs oldu

"Şamaxı"nın məşqçisi: "Qarabağ"la oyun dərs oldu

“Qarabağ” futbol komandasına qarşı mübarizə aparmaq hər zaman çətin bir sınaqdır. Bu fikri “Şamaxı” klubunun baş məşqçisi Azər Bağırov mətbuat konfransında səsləndirib.

Minval.info xəbər verir ki, Bağırov, Misli Premyer Liqasının ilk turunda Ağdam təmsilçisinə 1:3 hesabı ilə məğlub olduqları oyundan sonra fikirlərini bölüşüb. O, ilk turda belə güclü rəqiblə qarşılaşmanın futbolçular arasında müəyyən həyəcan yaratdığını bildirib. “Oyun yaxşı keçdi, lakin nəticə çıxarmalıyıq. Səhvlərimizi düzəltməli və daha yaxşı oynamalıyıq. Futbolçular tapşırıqları maksimum səviyyədə yerinə yetirməlidirlər, çünki kiçik səhvlər belə bağışlanmır,” – deyə Bağırov əlavə edib.

Azər Bağırov, “Şamaxı” klubunun heyətinin gənc və perspektivli yerli futbolçulardan ibarət olduğunu vurğulayıb. O, ölkə futboluna yeni istedadlar bəxş etməyi hədəflədiklərini və bu işin çətin olduğunu qeyd edib. “Ümid edirəm ki, yaxın gələcəkdə klubumuzun sponsoru da olacaq,” – deyə o, fikirlərini tamamlayıb.