Rubio Beynəlxalq Cinayət Məhkəməsini sərt tənqid etdi

ABŞ Dövlət katibi Marko Rubio Vaşinqtonun Beynəlxalq Cinayət Məhkəməsinin (BCM) yurisdiksiyasını tanımadığını bir daha bəyan edib.

Minval.info xəbər verir ki, Rubio məhkəməni sərt ifadələrlə tənqid edərək onu “axmaq təşkilat” adlandırıb.

Dövlət katibi bildirib ki, ABŞ bu məhkəmənin əsasını təşkil edən sazişi heç vaxt imzalamayıb və onun üzvü deyil. Onun sözlərinə görə, BCM heç bir hüquqi əsas olmadan sazişə qoşulmayan dövlətlərin rəhbərlərini və digər şəxsləri təqib etmək, eləcə də həbs etmək səlahiyyətinə malik olduğunu iddia edir.

Rubio qeyd edib ki, məhkəmədə ABŞ hərbçilərini, eləcə də hazırkı və ya gələcək prezidentləri məsuliyyətə cəlb etmək istəyən şəxslər var. O vurğulayıb ki, Vaşinqton buna heç vaxt imkan verməyəcək.

ABŞ Dövlət katibi əlavə edib ki, rəsmi Vaşinqton indiyədək Beynəlxalq Cinayət Məhkəməsini dəfələrlə xəbərdar edib və qurumun ABŞ-ın mövqeyini nəzərə almamasının nəticələri ilə üzləşəcəyini bildirib.