Ronaldunun yerə atdığı kapitanlıq sarğısı hərraca çıxarıldı

Portuqaliya millisinin ulduz futbolçusu Kriştianu Ronaldunun Serbiyaya qarşı DÇ-2022-nin seçməoyununda  yerə atdığı kapitanlıq sarğısı hərraca çıxarılıb.

“Report” “Tuttomercatoweb” nəşrinə istinadən xəbər verir ki, sarğı xeyriyyə məqsədi ilə satılacaq.

Ronaldu 2:2 hesablı heç-heçə ilə başa çatan matçda sarğını yerə tullayıb. 36 yaşlı hücumçu 3-cü uzatma dəqiqəsində qolunun sayılmamasına etiraz əlaməti kimi bu addımı atıb. Onun zərbəsindən sonra serbiyalı müdafiəçi Stefan Mitroviç topu qapı xəttinin içərisindən çıxarıb. Portuqaliyalı futbolçular topun qapı xəttini keçdiklərini bildirsələr də, niderlandlı baş hakim Denni Makkeli “davam” qərarı verib. Referinin qərarından qəzəblənən Ronaldu önündə sarı vərəqə görüb. Bundan sonra ulduz futbolçu kapitan sarğısını meydana çırpıb.

Qeyd edək ki, Portuqaliya bu gün Lüksemburqun qonağı olacaq. Qarşılaşma Bakı vaxtı ilə saat 22:45-də başlayacaq. A qrupunun digər matçında Azərbaycan millisi Serbiyanı qəbul edəcək. Həmin görüşə isə saat 20:00-da start veriləcək.