“Birinci yeri təmin edən yaxşı komandaya qarşı oynayacağıq. Bizim xala ehtiyacımız var. Ələxsüs böyük komandalara qarşı yaxşı oynamağa çalışmışıq. “Sevilya” da belə bir komandalardan biridir. Son saniyəyə qədər mübarizə aparacağıq. Çalışacağıq ki, yaxşı oyun göstərək”.

Bu sözləri “Qarabağ”ın baş məşqçisi Qurban Qurbanov Avropa Liqasının qrup mərhələsində qarşılaşacaqları “Sevilya” ilə oyundan əvvəl deyib.

Matçöncəsi mətbuat konfansında çıxış edən mütəxəssisin fikirlərini təqdim edirik:

“Maksim Medvedevin oynamaq şansı yüksəkdi. “Atletiko” və “Sevilya” fərqli komandalardı. Hər ikisi güclü rəqiblərdi. “Sevilya”nın növbəti mərhələni təmin etməsi, o demək deyil ki, onlar mübarizə aparmayacaqlar. Bakıda da beləydi. Hesab 2:0, 3:0 olanda belə mübarizə aparır, qol vurmaq istəyirdilər. Heyətdən asılı olmayaraq 90 dəqiqə dinamik futbol oynayırlar. Bu gün baş məşqçiləri də belə açıqlama verib.

“Qarabağ” burdan sərfəli nəticəylə qayıtmaq üçün öz oyun üslubuna sadiq qalmalıdı. Çalışırıq ki, hər bir rəqiblə oyunda öz üslubumuzu pozmayaq. “Sevilya”nın kreativ futbolçuları çoxdu. Daha az səhv etməliyik.

Bu gün “Sevilya” istənilən rəqibə qarşı dominantlıq etməyi sevir və rəqibini müdafiədən oynamağa məcbur edir. Ola bilər ki, oyun sistemimiz bir qədər dəyişər. Çünki zədədən qayıdan futbolçularımız var. Onlar tam formada deyilər. Yenə də çalışacağıq ki, oyun intizamı pozulmasın.

Məni narahat edən xüsusi nəsə yoxdu. Sadəcə, istəyirəm ki, bütün futbolçularım optimal formada olsun. Artıq bunu fikirləşmirəm, oyuna köklənmişik”.(sport7.az)