Qaziantepdə dəhşətli hadisə: Eşitmə və danışma məhdudiyyətli qızın qaranlıq anları

Türkiyənin Qaziantep şəhərində eşitmə və danışma məhdudiyyətli 23 yaşlı bir qızın qaçırılaraq dörd nəfərin cinsi zorakılığına məruz qaldığı iddia edilir.

Minval.info xəbər verir ki, hadisə Şahinbəy rayonunda baş verib. Qızlarından xəbər ala bilməyən ailə dərhal polisə müraciət edib. Şahinbəy Rayon Polis İdarəsinin əməkdaşları qızı taparaq təhlükəsiz bir yerə aparıblar.

Zərərçəkmiş ifadəsində zorla avtomobilə mindirildiyini və daha sonra üç nəfərin də maşına əyləşdiyini bildirib. Onun sözlərinə görə, şübhəlilər onu kimsəsiz bir əraziyə apararaq cinsi zorakılıq ediblər. Araşdırmalar nəticəsində 25 yaşlı M.Ş.E., 27 yaşlı M.T., 28 yaşlı S.B. və 17 yaşlı F.R. saxlanılıb. Şübhəlilərdən biri boyaçı, biri santexnik, digərləri isə bərbər və bərbər köməkçisi kimi işləyir. Faktla bağlı istintaq davam edir və şübhəlilər barəsində yekun hüquqi qərar məhkəmə tərəfindən veriləcək.