Qaxda fındıq böhranı: Məhsul əllərdə qaldı

Qax rayonunun kəndlərində fındıqçılıq, sakinlərin əsas gəlir mənbələrindən biri olaraq qalır. Lakin bu il fermerlər məhsuldarlıq və satış qiymətləri ilə bağlı ciddi problemlərlə qarşılaşıblar. Minval.info xəbər verir ki, Turaclı kəndində yaşayan sakinlər, fındıq bağlarında məhsulun bir hissəsinin zərərvericilər səbəbindən yararsız vəziyyətə düşdüyünü bildirirlər.

Fermerlər, həmçinin yetişdirilən məhsulun aşağı qiymətə alınmasının onların xərclərini qarşılamaqda çətinlik yaratdığını qeyd edirlər. Gübrə, dərman, suvarma və işçi qüvvəsinə çəkilən xərclərin artması, məhsulun satışından əldə olunan gəlirin bu xərcləri kompensasiya etməməsi ilə nəticələnir. “Bu kənddən ildə 100-200 ton fındıq bazara çıxarılır. Ağacların yarpağı tökülür, fındıq quruyur. Hər il ziyandayıq”, – deyə kənd sakini narazılığını ifadə edib.

Mütəxəssislər isə fındıq bağlarında xəstəliklərin qarşısının alınması və daha az ziyanla qarşılaşmaq üçün bağların vaxtında dərmanlanması və aqrotexniki qulluq edilməsinin vacibliyini vurğulayırlar. Həmçinin, müəyyən profilaktik tədbirlərin görülməsi və aqrar sığortadan istifadə olunması tövsiyə edilir.