Paşinyan AB-yə üzvlük üçün ilk addımı atır

Ermənistanın Avropa İttifaqına üzvlük istiqamətində ilk addımı atacağı və yaxın gələcəkdə rəsmi müraciət edəcəyi bildirilib. Bu barədə Ermənistan Baş naziri Nikol Paşinyan parlamentdə hökumətin 2026-2031-ci illər üçün proqramını təqdim edərkən məlumat verib.

Minval.info xəbər verir ki, Paşinyan, “İlk növbədə Ermənistanın Avropa İttifaqına üzvlük üçün rəsmi müraciət etməsi lazımdır” deyərək, bu prosesin ardından yol xəritəsinin hazırlanacağını vurğulayıb. O, həmçinin Ermənistanın Avrasiya İqtisadi Birliyindəki tərəfdaşlarının tələblərinin və narahatlıqlarının da nəzərə alınacağını qeyd edib.

Baş nazir, AB-yə üzvlük məsələsində yekun mərhələyə gəlinəcəyi təqdirdə xalq səsverməsinin keçirilməsinin mümkünlüyünü də əlavə edib. Xatırladaq ki, Ermənistan parlamenti 26 mart 2025-ci ildə ölkənin AB-yə qoşulması prosesinin başlanmasını nəzərdə tutan qanun layihəsini qəbul edib. Moskva isə İrəvanın Avropa ilə daha sıx inteqrasiyasının Rusiyanın rəhbərlik etdiyi Avrasiya İqtisadi Birliyinə üzvlüklə uyğun gəlməyəcəyi barədə xəbərdarlığını təkrarlayır.