Özbəkistanda zirzəmidə siam köpəkbalığı ferması!

Özbəkistanın Fərqanə şəhərində qeyri-adi bir hadisə baş verib. Burada bir sakin çoxmənzilli yaşayış binasının zirzəmisində süni su hövzəsi quraşdıraraq siam köpəkbalıqları yetişdirib. Bu hadisə ərazi müfəttişliyinin əməkdaşları tərəfindən aparılan yoxlamalar zamanı üzə çıxıb.

Minval.info xəbər verir ki, siam köpəkbalıqları dəniz köpəkbalıqlarına bənzəsə də, əslində şirin su balıqlarıdır. Lakin bu qeyri-adi fəaliyyət təkcə balıqlarla məhdudlaşmayıb. Yoxlama zamanı müfəttişlər ev sahibinin ümumi su təchizatı sisteminə qanunsuz qoşulduğunu da aşkar ediblər.

Zirzəmidən təyinatı üzrə istifadə qaydalarını pozan şəxs barəsində inzibati protokol tərtib olunub və cərimə tətbiq edilib. Eyni zamanda, suyun özbaşına istifadəsi ilə bağlı ayrıca sənədləşmə aparılıb. Aidiyyəti qurumlar tərəfindən ev sahibinə 15 gün müddətində zirzəmini boşaltmaq, quraşdırılmış hovuzu sökmək və otağı əvvəlki vəziyyətinə qaytarmaq barədə sərt xəbərdarlıq edilib.