Müğənni Güllünün ölümü: Qızı həbs olundu

Türkiyənin Yalova şəhərində 6-cı mərtəbədən yıxılaraq həyatını itirən məşhur müğənni Güllü’nün (Gül Tut) ölümü ilə bağlı istintaq davam edir. Hadisə ilə əlaqədar yeni detallar üzə çıxıb.

Minval.info xəbər verir ki, müğənninin qızı Tuğyan Ülkem Gülter “yaxın qohumunu qəsdən öldürmək” ittihamı ilə həbs olunub. Hadisənin yeganə şahidi Sultan Nur Ulu isə ev dustaqlığına buraxılıb. İstintaq çərçivəsində Sultan Nur Ulunun prokurorluqda hadisəni yenidən canlandırdığı görüntülər iş materiallarına əlavə edilib.

İş materiallarına daxil edilən digər sübut isə Sultan Nur Ulunun atası Ariflə telefon danışığının səs yazısıdır. Arif danışıq zamanı qızının ona hadisə barədə danışdığını və “Sultan mənə dedi ki, ‘Biz onu atdıq, ata. Biz onu atdıq, öldürdük’. Sultan dedi ki, mən onu atdım. O dedi ki, ‘Tuğyan mənə iki mənzil təklif etdi, mən də onu atdım'” ifadələrini səsləndirdiyini bildirib.