Müdafiə Nazirliyində milyonluq yeyinti qalmaqalı

Müdafiə Nazirliyinin İşlər İdarəsinin keçmiş rəisi polkovnik Elnur Süleymanov və həmin idarənin daha üç əməkdaşı barəsində cinayət işi açılıb. Onlar 1 milyon manatdan artıq vəsaitin mənimsənilməsində ittiham olunurlar.

Minval.info xəbər verir ki, Elnur Süleymanovla yanaşı, bölmə rəisi polkovnik-leytenant Emin Əliyev, idarənin digər əməkdaşları Məsud İbrahimov və Pərviz Abdullayev də istintaqa cəlb edilib. Onlara qarşı Cinayət Məcəlləsinin 179.4-cü maddəsi ilə ittiham irəli sürülüb. Təqsirləndirilən şəxslər hazırda həbsdə deyil, məhkəməyə qədər barələrində alternativ qətimkan tədbiri seçilib. Əgər ziyan ödənilməzsə, onları 14 ilə qədər həbs cəzası gözləyir.

Xatırladaq ki, Elnur Süleymanov sonuncu dəfə Azərbaycan Ordusunun keçmiş baş qərargah rəisi Nəcməddin Sadıkovun xərcləri ilə bağlı məhkəməyə göndərdiyi hesabatla gündəmə gəlmişdi. Həmin hesabatda N.Sadıkova 6 dəst armudu stəkanın alınması üçün 21 min manat, hər biri 100 manat olan 80 çaxırın alınması üçün isə 8 min manat xərcləndiyi qeyd olunmuşdu.