Meloni İtaliyada yeni siyasi rekord qırdı

İtaliyanın Baş naziri Ciorcia Meloni, ölkənin İkinci Dünya müharibəsindən sonrakı siyasi tarixində yeni bir rekorda imza atıb. Meloninin rəhbərlik etdiyi hökumət, 1 413 gün fasiləsiz fəaliyyət göstərərək, Silvio Berluskoni hökumətinin 1 412 günlük rekordunu geridə qoyub. İtaliyada son 80 ildə 68 hökumətin dəyişdiyini nəzərə alsaq, bu göstərici ölkənin siyasi tarixində xüsusi əhəmiyyət daşıyır.

Minval.info xəbər verir ki, Meloninin rəhbərlik etdiyi “İtaliya Qardaşları” partiyası, bu rekordu qeyd etmək üçün Bari şəhərində böyük bir tədbir təşkil edəcək. Tədbirə təxminən 10 min tərəfdarın qatılması, iştirakçıların Bariyə 80-ə yaxın avtobusla gətirilməsi planlaşdırılır. Meloninin tədbirdə çıxış edəcəyi, baş nazir müavinləri Matteo Salvini və Antonio Tajaninin isə video bağlantı ilə iştirak edəcəyi gözlənilir. Tədbirin 2027-ci ildə keçirilməsi planlaşdırılan seçkilər ərəfəsində Meloninin siyasi güc nümayişinə çevriləcəyi də bildirilir.

Bu arada, hökumət tərəfdarları Bari limanında toplaşarkən, müxalif qrupların şəhərin tarixi mərkəzində etiraz aksiyası keçirməsi planlaşdırılır.