Maştağada ailə mübahisəsi qanla bitdi

Sabunçu rayonunun Maştağa qəsəbəsində bıçaqlanma hadisəsi baş verib. Hadisə Hüsü Hacıyev küçəsində yerləşən fərdi yaşayış evində qeydə alınıb. 1982-ci il təvəllüdlü Nüsrət Məmmədov atasının yaşadığı evə gəlib və burada bacısı ilə zibil torbası üstündə mübahisə edib. Bu zaman bacısının 21 yaşlı oğlu Zakir Məmmədov dayısının anasına qışqırmasına etiraz edib və mübahisə əlbəyaxa davaya çevrilib. Minval.info xəbər verir ki, dava zamanı Zakir Məmmədov masanın üzərində olan mətbəx bıçağını götürərək dayısına üç zərbə endirib. Nüsrət Məmmədov ağır vəziyyətdə Kliniki Tibbi Mərkəzə çatdırılıb. Zakir Məmmədov şübhəli şəxs qismində saxlanılıb. Faktla bağlı araşdırma aparılır.