Loqoped uşağa şiddət göstərdi: Video yayıldı

Şirvan şəhərində fəaliyyət göstərən bir mərkəzdə loqopedin nitq qüsuru olan uşağa fiziki şiddət göstərdiyi iddia edilir. Təlimçi Ceyran adlı şəxs, uşağın nitqindəki irəliləyişləri valideynə göstərmək məqsədilə məşğələ prosesini telefonla çəkib. Lakin videoda uşağa şiddət göstərdiyi hissəni montaj etməyi unudaraq, görüntüləri olduğu kimi valideynə göndərib.

Minval.info xəbər verir ki, hadisə ilə bağlı görüntülər sosial şəbəkələrdə yayılıb. Videoda təlimçinin uşağa danışmağı öyrədərkən onun baş nahiyəsinə bir neçə dəfə zərbə endirdiyi görünür. Məlumata görə, Ceyran adlı təlimçi əvvəllər “Qüsursuz Nitq və Psixologiya Mərkəzi”ndə çalışıb, lakin mərkəzin rəhbəri Esmira Qafarova onun təxminən il yarım əvvəl işdən ayrıldığını və hazırda mərkəzlə heç bir əlaqəsinin olmadığını bildirib.

Faktla bağlı məlumat və görüntülər hüquq-mühafizə orqanlarına təqdim olunub və araşdırma aparılır.