Kreml Türkiyə-Ermənistan sərhədinin açılmasını istəyir

Ermənistanın xarici işlər naziri Ararat Mirzoyan Türkiyə ilə sərhəddə yerləşən ‘Marqara’ keçid məntəqəsini ziyarət edib. Bu ziyarət zamanı Ermənistanın xaricdə akkreditə olunmuş diplomatik nümayəndəliklərinin rəhbərləri də iştirak ediblər. Səfər çərçivəsində Ermənistan Dövlət Gəlirləri Komitəsinin rəhbəri Eduard Akopyan məntəqənin təmiri və təchizatı üzrə görülən işlər barədə məlumat verərək, onun istismara tam hazır olduğunu bildirib.

Minval.info xəbər verir ki, Türkiyə 1993-cü ildə Ermənistanla sərhəddə yerləşən bu keçid məntəqəsini bağlamışdı. Siyasi şərhçi Mehman Əliyev bildirib ki, ‘Marqara’ keçid məntəqəsinin açılması üçün İrəvanın ilk növbədə Rusiya ilə razılığa gəlməsi vacibdir. İrəvanın Rusiyadan uzaqlaşmaq strategiyası götürdüyü bir vaxtda, Ermənistanın İran və Türkiyə ilə sərhədlərini rus sərhədçiləri qoruyur. Bu səbəbdən, sərhədin açılması üçün İrəvanla Moskva arasında razılaşma olmalıdır.

Mehman Əliyevin fikrincə, Rusiya özü də Türkiyə-Ermənistan sərhədinin açılmasında maraqlı ola bilər. Moskvanın alternativ logistika marşrutlarına ehtiyacı var və bu zaman üç variant ortaya çıxır: Türkiyə-Gürcüstan sərhədi, Naxçıvan-Ermənistan marşrutu və birbaşa Ermənistan ərazisindən keçən daha qısa yol. Bu səbəbdən, Moskvanın sərhədin açılmasına razılıq verməsi mümkündür, çünki Kreml Türkiyə-Ermənistan sərhədinin açılmasında və Rusiyanın da bu marşrutdan istifadə edə bilməsində maraqlıdır.