Kartdan karta köçürmələrə yeni limitlər: Maliyyə nəzarəti güclənir və dələduzlar üçün çətin günlər başlayır

Avqustun 1-dən etibarən kartdan karta köçürmələrə yeni məhdudiyyətlər tətbiq olunmağa başlanılıb. Bu qaydalara görə, bir şəxs gün ərzində maksimum 5 köçürmə həyata keçirə və 5 köçürmə qəbul edə bilər. Aylıq köçürmə limiti isə 20 min manat olaraq müəyyən edilib. Lakin şəxsin öz adına olan kartlar arasında aparılan köçürmələr bu məhdudiyyətlərdən istisnadır.

Minval.info xəbər verir ki, iqtisadçı ekspert Rəşad Hüseyn bu yeniliklərin əsas məqsədinin nağdsız ödənişlərə və maliyyə əməliyyatlarına nəzarəti gücləndirmək olduğunu vurğulayıb. Onun sözlərinə görə, bu addım pos-terminallarla ödənişlərin artmasına və vergi daxilolmalarının yüksəlməsinə səbəb olacaq, eyni zamanda qeyri-qanuni əməliyyatların qarşısını almağa kömək edəcək. Dələduzluq və müxtəlif sxemlərlə vəsait əldə etməyə çalışan qrupların fəaliyyəti çətinləşəcək.

Rəşad Hüseyn əlavə edib ki, gələcəkdə bu qaydaların daha da təkmilləşdirilməsi vacibdir. Banklar süni intellektin imkanlarından istifadə edərək, kütləvi ödənişləri daha dəqiq analiz etməli və riskli əməliyyatlara nəzarəti gücləndirməlidir. Bu, çirkli pulların və dələduzluğun qarşısını almağa və vətəndaşların əlavə çətinliklərlə üzləşməməsinə imkan yaradacaq.