Kamran Səfərəliyev vergi xidmətinə rəis təyin edildi

İqtisadiyyat Nazirliyi yanında Dövlət Vergi Xidmətinin Milli Gəlirlər Baş İdarəsinə yeni rəis təyin olunub. Bu vəzifəyə Kamran Rəşad oğlu Səfərəliyev gətirilib. O, 2022-ci ilin avqustundan 2026-cı ilin avqustunadək həmin Baş İdarənin rəis müavini vəzifəsində çalışıb.

Minval.info xəbər verir ki, Kamran Səfərəliyev vergi orqanlarında fəaliyyətinə 2018-ci ilin oktyabrında başlayıb. 2018-2019-cu illərdə Vergilər Nazirliyində şöbə rəisi, 2019-2022-ci illərdə isə departament rəisinin müavini vəzifələrində işləyib.

Bundan əvvəl Səfərəliyev təxminən 9 il “EY” beynəlxalq audit şirkətində çalışıb və burada audit üzrə müxtəlif vəzifələrdən başlayaraq Assurance Manager vəzifəsinədək yüksəlib. Onun fəaliyyəti əsasən neft-qaz, telekommunikasiya, sənaye və digər iri şirkətlərin auditini əhatə edib. Səfərəliyev 2014-cü ildə “EY Budapest” ofisində də çalışıb. 2017-ci ildə isə Azərbaycan Dövlət İqtisad Universitetinin SABAH qruplarında müəllim kimi fəaliyyət göstərib.