İbuprofenin həddindən artıq istifadəsi təhlükə saçır

Geniş istifadə olunan ağrıkəsici preparatlardan biri olan ibuprofenin sağlamlıq üçün təhlükə yarada biləcəyi barədə xəbərdarlıq edilib. Həkim Sara Marin Berbellin sözlərinə görə, ağrı hiss edən insanlar həkim təyinatı ilə ibuprofen qəbul edə bilərlər. Lakin bu preparatın həddindən artıq istifadəsi ciddi fəsadlara səbəb ola bilər.

Minval.info xəbər verir ki, Sara Marin Berbell ibuprofenin müntəzəm və həkim nəzarəti olmadan qəbul edilməsinin böyrəklərlə bağlı problemlər yarada biləcəyini qeyd edib. Həkim, pasiyentlərindən birinin nümunəsini göstərərək, həmin qadının aybaşı ağrılarını normal hesab etdiyi üçün mütəmadi olaraq ibuprofen qəbul etdiyini və nəticədə qan analizlərinin böyrək funksiyalarında pozuntular aşkar etdiyini bildirib.

“İbuprofeni arabir qəbul etmək başqa şeydir, hər həftə qəbul etmək isə tamamilə başqa məsələdir”, – deyə S.M. Berbell vurğulayıb. Mütəxəssis əlavə edib ki, ağrı insanı davamlı olaraq ağrıkəsici qəbul etməyə məcbur edirsə, narahatlığın səbəbi araşdırılmalı və problem sadəcə müvəqqəti olaraq aradan qaldırılmamalıdır.