Hövsanda zibil böhranı: Sakinlər antisanitar şəraitdən gileylənirlər – FOTOLAR / VİDEO

Bakının Suraxanı rayonu, Hövsan MİDA yaşayış kompleksinin sakinləri ərazidə acınacaqlı antisanitar vəziyyətin yaranmasından və tullantıların vaxtında daşınmamasından ciddi şəkildə narahatdırlar. Məhəllələrdə xüsusi zibil konteynerləri qoyulsa da, onların ətrafı tullantı poliqonunu xatırladır.

Minval.info xəbər verir ki, kompleks sakinləri tullantı daşıyan xüsusi nəqliyyat vasitələrinin əraziyə olduqca gec – yalnız 3-4 gündən bir gəldiyini bildirirlər.

Nəticədə konteynerlər qısa müddətdə dolur və tullantılar ətrafa səpələnir. Yay mövsümündə bu vəziyyət ərazidə kəskin pis qoxunun yayılmasına, həşəratların çoxalmasına və infeksiya mənbəyinin yaranmasına səbəb olur. Sakinlər yaşayış massivinin həm estetik görünüşünü korlayan, həm də sakinlərin, xüsusilə azyaşlı uşaqların sağlamlığı üçün ciddi təhlükə törədən bu problemin bir an öncə aidiyyəti qurumlar tərəfindən həll olunmasını tələb edirlər.