Ermənistanın yeni diplomatik hədəfləri açıqlandı

Ermənistanın xarici işlər naziri Ararat Mirzoyan, ölkəsinin yeni diplomatik hədəflərini açıqlayıb. İrəvanda keçirilən toplantıda, Ermənistan Xarici İşlər Nazirliyinin mərkəzi aparatının rəhbərliyi və xaricdəki diplomatik nümayəndəliklərin rəhbərləri iştirak ediblər.

Minval.info xəbər verir ki, konfransda çıxış edən Ararat Mirzoyan, Ermənistan Respublikasının diplomatik xidmətinin yeni bir mərhələyə qədəm qoyduğunu bəyan edib. O, mövcud reallıqlar fonunda ölkənin qarşısında duran çağırışların və imkanların tamamilə fərqli olduğunu vurğulayıb.

Mirzoyan, diplomatik korpusun əsas vəzifəsinin Ermənistanın müstəqilliyini və dövlətin dözümlülüyünü gücləndirmək olduğunu, eləcə də qonşu dövlətlərlə münasibətlərin normallaşdırılması prosesində iqtisadi potensialdan tam istifadə etməyin vacibliyini qeyd edib.