Erməni müxalifətçidən sensasiyalı iddia: Azərbaycanı da ittiham etdi

Ermənistanda müxalifət nümayəndələri ölkədaxili siyasi proseslərlə bağlı yeni ittihamlar səsləndirməkdə davam edirlər. Minval.info xəbər verir ki, Ermənistan Milli Konqresi Partiyasının sədr müavini Levon Zorabyan baş nazir Nikol Paşinyanı avtoritar idarəçilik qurmağa çalışmaqda ittiham edib.

Zorabyan bildirib ki, Narek Karapetyan ətrafında baş verən hadisələr hakimiyyətin siyasi təzyiq siyasətinin tərkib hissəsidir. Onun sözlərinə görə, Paşinyan Karapetyanın təcrid olunması vasitəsilə “Güclü Ermənistan” partiyasının deputatlarına təzyiq göstərməyə və onları qorxutmağa çalışır.

Erməni siyasətçi iddia edib ki, baş nazir bu prosesdə tək deyil. Onun sözlərinə görə, Paşinyanın arxasında ABŞ, Avropa İttifaqı, İsrail, Türkiyə və Azərbaycanın dayandığı ehtimal olunur.

Bu iddialar fonunda Zorabyan Ermənistan müxalifətini təşkilatlanmağa və mümkün siyasi proseslərə qarşı indidən hazırlaşmağa çağırıb.

“Müxalifət artıq indidən müqavimətin təşkili üçün hazırlıq işlərinə başlamalıdır”, – deyə o bildirib.

Qeyd edək ki, Zorabyanın səsləndirdiyi fikirlər onun şəxsi iddialarıdır və bu barədə hər hansı sübut təqdim olunmayıb.