"Davam" Oxçuçayla bağlı sosial media kampaniyası həyata keçirib

Kampaniya iştirakçıları Oxçuçaydakı ekoloji balansın pozulması ilə bağlı laborator nəticələrin və xüsusi fotoşəkillərin əks olunduğu postlarla birlikdə rus və ingilis dillərində hazırlanan kontentləri “Twitter” sosial media platforması üzərində kütləvi formada paylaşaraq dünya ictimaiyyətinin diqqətini Oxçuçayda baş verən ekoloji böhran və mövcud kritik vəziyyətə yönləndirməyi bacarıblar. Belə ki, kampaniya çərçivəsində istifadə olunan #ecoterror və #Okhchuchay həştəqləri “Twitter” sosial media platformasının Azərbaycan, Türkiyə və Ermənistan seqmentində trendə çevrilib. #Ecoterror həştəqi ilə Azərbaycan seqmentində 31 mindən çox, Türkiyə seqmentində 5 mindən çox, Ermənistan seqmentində isə 12 mindən çox paylaşım edilib. Eyni zamanda Oxçuçayla bağlı paylaşılan tvitlər “Twitter”in Ermənistan seqmentində “Top tweets” siyahısına daxil olub və Ermənistanın siyasi gündəminə çevrilib. Ümumilikdə isə kampaniya çərçivəsində verilən məlumatlar yerli və beynəlxalq səviyyədə yarım milyondan çox istifadəçiyə çatıb.

Qeyd edək ki, sözügedən kampaniya Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin dəstəyi ilə icra edilən “Beynəlxalq sosial mediada Oxçuçay mövzusunda kampaniyanın keçirilməsi” adlı layihə çərçivəsində baş tutub.