Bundesliqanın bərpası təxirə düşdü

Almaniya Bundesliqasında mövsüm mayın 9-da bərpa olunmayacaq.

Fanat.Az ESPN-ə istinadən xəbər verir ki, hökumət məsələ ilə bağlı yekun qərarını növbəti həftəyə kimi təxirə salıb.

Kansler Angela Merkel və federal əyalətlərin başçıları cümə axşamı keçirilən sammitdə koronavirusun təsirlərini müzakirə ediblər. Federal kansler Helge Braunun qətnamə layihəsini 6 maya nəzərdə tutulmuş növbəti iclasda təqdim edəcəyi bildirilib.

Alman Futbol Liqasının (DFL) son bəyanatında 9 mayda mövsümü bərpa etməyə hazır olduqları bildirilmiş, bununla belə, yekun qərarın siyasətçilər tərəfindən veriləcəyi qeyd olunmuşdu. Bundesliqanın mümkün startı ilə bağlı qərar növbəti həftəyə təxirə salındığından, oyunların 9 mayda keçirilməsi ehtimal daxilində deyil.

Qeyd edək ki, hazırda Bundesliqa klubları kiçik qruplar halında məşqlərini davam etdirirlər.