"Brilliant kimi erməniyə "super" yaza bilmərəm" - Röya

Xalq artisti Röya Ayxan qonaq olduğu “3D” proqramında açıqlamaları ilə gündəmə gəlib.

Minval.info xəbər verir ki, müğənni aparıcı Dadaş Dadaşlinskinin “Brilliant Dadaşova erməni ifaçının altına “super” yazmışdı. Dedi ki, görsəm, erməni yaxşı ifa edir, yenə yazacam. Çünki mahnının milliyəti olmur” sözlərinə qalmaqallı reaksiya verib:

“Onda niyə şərhi sonra pozdu? Deməli, öz etdiyinə inanmaq istəmədi. Nə qədər desək də, musiqinin milliyəti yoxdur… Danışmadığım müğənninin mahnısını zümzümə edərəm. Amma millətimi incidənə “super” yazmaram. Çünki mən qarabağlıyam, nəslim yurdundan ayrı düşüb, hamısının əziyyətini çəkirəm. Hələ bu qədər əziyyət qabağında “super” yazacam? Heç vaxt, istəyir mahnımı gözəl oxusun. Ümumiyyətlə mənim mahnımı niyə oxusunlar? Brilliant xanımla bu barədə razı deyiləm, bundan sonra da olmaram. O da belə sözünü deyən qadındır, sevirəm onu. Fikrini deyib, sonra, pozub”.

Xalq artisti Brilliant Dadaşovanın Röya Ayxanın sözlərinə cavabı gecikməyib. Müğənni bununla bağlı “İnstagram” səhifəsində paylaşım edib.

“Səhnəyə çıxdığım gündən indiyənə kimi təriflədiyim hər kəs fürsət tapdıqca kölgəmi qılıncladı. Mən də hər zaman musiqilərimə, sənətimə və sizlərə güvənərək təsəlli tapdım. Şükür olsun, arzularımın adamı həyatımdadır” deyən Dadaşova “Şükür ola” mahnısını yayımlayıb.

Dadaşova daha sonra “İnstagram”da Röyanı izləmə siyahısından çıxarıb.

Minval.info