Bakıda ictimai nəqliyyatda 90 dəqiqə pulsuz keçid!

Bakıda ictimai nəqliyyat sistemində mühüm yeniliklər tətbiq olunmağa başlanıb. Şəhər, Azərbaycanda ilk dəfə olaraq, brutto müqavilə modelinə keçid edir. Bu modelin tətbiqi ilə sərnişinlər üçün 90 dəqiqəlik pulsuz keçid və yeni bilet paketləri təqdim ediləcək.

Minval.info xəbər verir ki, nəqliyyat məsələləri üzrə ekspert Rauf Ağamirzəyev bu yeniliklərin ictimai nəqliyyatın maliyyə dayanıqlığını artıracağını bildirib. Onun sözlərinə görə, brutto müqavilə modeli daşıyıcıların maliyyə sabitliyini təmin edəcək və xidmət keyfiyyətinin yüksəldilməsinə şərait yaradacaq. Sərnişinlər üçün günlük, həftəlik, aylıq və illik bilet paketlərinin tətbiqi də nəzərdə tutulur ki, bu da uzunmüddətli istifadəçilər üçün daha sərfəli olacaq.

Ekspert əlavə edib ki, 90 dəqiqə ərzində ödənişsiz keçid imkanı sərnişinlərin gündəlik nəqliyyat xərclərini optimallaşdıracaq. Bu imkan, xüsusilə şəhər daxilində bir neçə nəqliyyat növünü dəyişən sərnişinlər üçün əhəmiyyətli olacaq. İctimai nəqliyyatın rəqəmsallaşdırılması və ekspress avtobuslarda validatorların quraşdırılması da bu prosesin bir hissəsidir. Bu dəyişikliklər sürücülərin iş yükünü azaldacaq və sərnişinlərin təhlükəsizliyini artıracaq.