Restoranda iki qardaşı bıçaqlayan Namiq Şirinliyə ağır cəza tələbi: Prokuror cəzasını açıqladı

Bakının Sabunçu rayonunda baş vermiş qanlı insidentlə bağlı məhkəmə istintaqı yekunlaşmaq üzrədir. Tanışlarına bıçaqla xəsarət yetirməkdə təqsirləndirilən Namiq Şirinlinin cinayət işi üzrə növbəti məhkəmə prosesi tutulub.

Minval.info xəbər verir ki, Bakı Ağır Cinayətlər Məhkəməsində hakim Namiq Kərimovun sədrliyi ilə keçirilən iclasda dövlət ittihamçısı çıxış edib. Prokuror Namiq Şirinlinin 8 il 6 ay müddətinə azadlıqdan məhrum edilməsini məhkəmədən xahiş edib. Məhkəmənin növbəti iclası avqustun 19-na təyin olunub.

Qeyd edək ki, qalmaqallı hadisə 2025-ci il sentyabrın 25-də Sabunçu rayonundakı restoranların birində qeydə alınıb. Namiq Şirinli məkanda əyləşən Babək və Asəf Qazıyev qardaşlarına yaxınlaşaraq onlardan pul tələb edib. Tərəflər arasında yaranan mübahisə nəticəsində N.Şirinli üzərində gezdirdiyi bıçaqla hər iki qardaşa zərbələr endirib.

Faktla bağlı Namiq Şirinliyə qarşı Cinayət Məcəlləsinin 126.2.4 (Xuliqanlıq niyyəti ilə qəsdən sağlamlığa ağır zərər vurma) və 221.3-cü (Silahdan və ya silah kimi istifadə olunan əşyalardan istifadə etməklə xuliqanlıq) maddələri ilə ittiham irəli sürülüb.