Azərbaycan Kunq Fu Federasiyasının idarə heyətinin iclası  keçirilib

Mayın 2-də Azərbaycan Kunq Fu Federasiyasının idarə heyətinin iclası  keçirilib.

İclası açıq elan edən Federasiyanın prezidenti Nurlan Aslanov Ölkə Prezidenti cənab İlham Əliyevin idmana, idmançılara göstərdiyi diqqət və qayğıdan bəhs edib, federasiyanın qarşıya qoyduğu hədəfləri açıqlayıb.

Daha sonra İdarə Heyətinin qərarı ilə bir sıra vəzifələrə təyinatlar olub, yeni tərkib formalaşıb. Belə ki, kikboksinq üzrə 5 qat dünya çempionu, Prezident mükafatçısı, dəfələrlə beynəlxalq turnirlərin qalibi olmuş Ehram Məcidov ümumi işlər üzrə vitse-prezident, iş adamı Tural Alişanlı ictimaiyyətlə əlaqələr üzrə vitse-prezident, dünya və Avropa çempionu, Prezident mükafatçısı, əməkdar idman ustası Emil Hacıyev peşəkarlar üzrə baş məşqçi, böyüklər üzrə baş məşqçi dünya və Avropa çempionu, əməkdar idman ustası Ramin Allahverdiyev, gənclərin baş məşqçisi dünya çempionatının mükafatçısı, idman ustası Aqil Mustafayev təyin olunub. Yeniyetmələrin baş məşqçiliyi isə dünya çempionu, idman ustası Ellər Orucova həvalə edilib.

Yeni vəzifələrə təyin olunan idman camiyasının tanınmış simaları öz çıxışlarında belə bir mühüm vəzifələrə etimad göstərildiyi üçün federasiya rəhbərliyinə təşəkkür edərək, Dövlət başçısının ətrafında sıx birləşdiklərini, dövlətin idman sahəsində idmançıların qarşısına qoyduğu öhdəliyi yüksək səviyyədə həyata keçirəcəklərini diqqətə çatdıraraq, gənc nəslin sağlam mühütdə yetişməsi üçün əllərindən gələni əsirgəməyəcəklərini vurğulayıblar. Sonda Respublika və Dünya çempionatına hazırlıq müzakirə edilərək yekun qərar verilib.