Avtobuslar üçün məsafə əsaslı ödəniş modeli

Azərbaycanda avtobuslar qət etdiyi yola görə ödəniş alacaq. Bu yenilik Nazirlər Kabinetinin 31 iyul 2026-cı il tarixli 250 nömrəli Qərarı ilə təsdiqlənən “Avtomobil nəqliyyatı ilə müntəzəm sərnişin daşımaları həyata keçirən daşıyıcılar tərəfindən məsafə əsaslı avtomobil nəqliyyatı xidmətinin göstərilməsinə görə ödənilən subsidiyanın hesablanması və ödənilməsi Qaydası”nın tətbiqi ilə həyata keçirilir.

Minval.info xəbər verir ki, ilk olaraq 130, 205, 211, 500 və 503 nömrəli müntəzəm marşrutlar “brutto müqavilə” sisteminə qoşulub. Bu sistemə uyğun olaraq, digər marşrutlar da yaxın zamanda qoşulacaq. Yeni modelə əsasən, daşıyıcılara qət edilən məsafəyə və xidmətin keyfiyyətinə görə ödənişlər ediləcək. Marşrut üzrə avtobusların sayı, hərəkət intervalı və qət ediləcək məsafə əvvəlcədən müəyyənləşdirilir. Daşıyıcı isə bu tələblərə uyğun göstərdiyi xidmətə görə ödəniş alır.

Bu model sərnişinlər üçün daha müntəzəm və etibarlı ictimai nəqliyyat xidməti formalaşdırmağa imkan verəcək. Eyni zamanda, daşıyıcıların yalnız gəlirli marşrutlara üstünlük verməsinin qarşısı alınacaq və şəhərətrafı azrentabelli marşrutlarda da xidmət səviyyəsinin yüksəldilməsinə şərait yaranacaq. Dünyanın bir çox ölkəsində tətbiq olunan “brutto müqavilə” modeli artıq ölkəmizdə də uğurla tətbiq olunmağa başlanır.

ƏLAQƏLİ

Bunu da oxu

Bakıda nəhəng ağac maşının üzərinə düşdü

03.09.2026 - 20:55

Yeni model daşıyıcıların fəaliyyətinə daha sistemli nəzarət imkanları da yaradır. Müəyyən edilmiş keyfiyyət tələblərinin pozulması halında maliyyə və digər təsir mexanizmləri tətbiq ediləcək. Xüsusi proqram təminatı vasitəsilə daşıyıcıların göstərdikləri xidmətin keyfiyyətinin ölçülməsi və nəzarət təmin ediləcək. Bu model, həmçinin daşıyıcıların maliyyə dayanıqlığını və uzunmüddətli planlaşdırma imkanlarını artıracaq, avtobus parkının yenilənməsinə və xidmət keyfiyyətinə daha çox investisiya yatırılmasına imkan verəcək.