ABŞ-dan Körfəz ölkələrinə yeni təhlükəsizlik vədləri

ABŞ, İsrail və bir sıra ərəb ölkələrinin yüksək səviyyəli hərbi rəhbərləri, İranla müharibə ehtimalları və regiondakı gərginlikləri müzakirə etmək məqsədilə Almaniyada bir araya gəldilər. Bu görüşdə ABŞ Mərkəzi Komandanlığının (CENTCOM) rəhbəri admiral Bred Kuperin təşkilatçılığı ilə İsrail, Səudiyyə Ərəbistanı, Birləşmiş Ərəb Əmirlikləri, Bəhreyn, Küveyt, Qətər, İordaniya və Misirin baş qərargah rəisləri iştirak etdilər.

Minval.info xəbər verir ki, görüşdə Yaxın Şərqdə təhlükəsizlik əməkdaşlığının gücləndirilməsi imkanları müzakirə edildi. Admiral Bred Kuper, Amerika qüvvələrinin regiondan çıxarılmayacağını bildirərək, Hörmüz boğazında gəmi hərəkətinin genişləndirilməsi ilə bağlı ABŞ-nin planlarını iştirakçılara açıqladı.

Hərbi ekspert Üzeyir Cəfərovun sözlərinə görə, tərəflər Yaxın Şərqdəki problemləri aradan qaldırmaq üçün bir araya gəliblər. ABŞ, Yaxın Şərqdəki bazalarının təhlükəsizliyini təmin etmək üçün Səudiyyə Ərəbistanı, BƏƏ, Küveyt, Bəhreyn və digər ölkələrə Hava Hücumundan Müdafiə və müasir hərbi avadanlıqların verilməsi istiqamətində dəstək verəcəyini vəd edib.