Qaşıqçı cinayətində ilginc detal: "Təndiri yandırmağımı istədilər"

2018-ci ildə Səudiyyə Ərəbistanının İstanbul Baş Konsulluğunda qətlə yetirilən jurnalist Camal Qaşıqçının cinayət işində qəribə detal üzə çıxıb.

Musavat.com Türkiyə mətbuatına istinadən bildirir ki, hadisənin baş verdiyi tarixdə konsulluqda texniki işçi olan Zeki Demir 11-ci Ağır Cəza Məhkəməsində Qaşıqçının öldürülməsi ilə əlaqədar şahid kimi ifadə verib.

Qaşıqçının nişanlısı Xədicə Cengizin də iştirak etdiyi məhkəmədə Zeki Demirin dediyi sözlər hər kəsi şoka salıb.

O, bildirib ki, Qaşıqçının itdiyi gün ona konsulluqda yerləşən təndiri yandırmağı tələb ediblər: “Məndən təndiri yandırmağımı istədilər. Ətrafda bir təşviş vardı. Oradan mümkün qədər tez ayrılmağımı istəyirdilər. Təndiri yandırdım. Ətrafdakı mərmər parçalarının rənginin dəyişdiyini gördüm. Düşündüm ki, kimyəvi maddə ilə yuyulduğu üçün belə olub. Təndir qapağının altında olan mərmərlər də parçalanmışdı”.

Xatırladaq ki, 2018-ci ildə Qaşıqçının cəsədi axtarılarkən, konsulluqdakı həmin təndirin içi də araşdırılmışdı. Lakin heç bir izə rast gəlinməmişdi.