Poroşenko və ailəsi xaricə saxta adlarla gedirmiş

Ukrayna prezidenti Petro Poroşenko və onun ailə üzvlərinin 2016-cı ildən etibarən xarici ölkərələrə dəfələrlə saxta adlarla getdiyi məlum olub.

“Qafqazinfo”nun “Komsomolskaya pravda”ya istinadən verdiyi xəbərə görə, prezidentin ailə üzvləri üçün saxta sənədləri Ukraynanın Təhlükəsizlik Xidməti hazırlayıb.

Belə ki, Vera Lazareva (Vera Lazarieva), İvan Dehterev (Ivan Dektteriev),  Yevgeniya Safonova (Evheniia Safonova), Aleksandr Sışikov (Oleksandr Syshchykov),  Katerina Boyeva (Kateryna Boeiva), Vitali Kokorin (Vitalii Kokorin), Yelena Sentsenka (Olena Senchenko) və Olqa Herasimenka (Olha Herasymenko) adına sənədlər hazırlanıb.

Qeyd olunur ki, bu sənədlər Poroşenko ailəsinin bütün üzvləri və onun azyaşlı nəvəsinin dayəsi üçün nəzərdə tutulub.

Nəşr həmçinin, Poroşenko ilə ailə üzvlərinin şəxsi səfərlərini də dərc edib.

Belə ki, Ukrayna prezidenti son iki ildə üç dəfə Maldiv adalarında və İspaniyada olub, Norveç və Fransaya gedib. Bunların hamısı şəxsi səfərlər olub.

O, 2018-ci ilin yanvarında məzuniyyətini ailəsi ilə Maldiv adalarında keçirib. Prezident 8 böyük adamın və 2 uşağın məzuniyyət dövründə təkcə bir neçə ölkəyə uçuşlarına 188 min dollar pul xərcləyib, oteldə bir gün qalmağa görə 46 min dollar ödəyib.