Onlayn alış-verişdə təhlükəsizlik: Kiberdələduzların tələsinə düşməmək üçün nə etməli?

Daxili İşlər Nazirliyi, onlayn alış-veriş edən vətəndaşlara təhlükəsizlik tədbirləri ilə bağlı xəbərdarlıq edib. Nazirlik, kiberdələduzların saxta satış səhifələri yaradaraq vətəndaşları aldatmağa çalışdığını bildirir.

Minval.info xəbər verir ki, aparılan araşdırmalar və daxil olan müraciətlər, kiberdələduzların cəlbedici qiymətlərlə məhsullar təklif edərək, ödənişdən sonra vətəndaşlarla əlaqəni kəsdiyini göstərir. Bu səbəbdən, vətəndaşlara internetdə qarşılaşdıqları satış səhifələrinin etibarlılığını yoxlamaq və tanımadıqları şəxslərdən məhsul sifariş etməmək tövsiyə olunur.

Ödəniş etməzdən əvvəl satıcı haqqında məlumatların və səhifənin həqiqiliyinin yoxlanılması vacibdir. Həmçinin, bank kartı məlumatlarınızı və digər məxfi məlumatları üçüncü şəxslərlə paylaşmamaq məsləhət görülür. Kiberdələduzluq halları ilə üzləşdikdə, dərhal DİN-in “102” Xidməti-Zəng Mərkəzinə və ya Nazirliyin rəsmi sosial şəbəkə hesablarına müraciət etmək lazımdır.