Gələn il fevralın 9-da keçiriləcək parlemnt seçkilərində iştirak üçün dairə seçki komissiyalarına müraciət edənlərin sayı 901 nəfərə çatıb.

Teleqraf.com-un məlumatına görə, bu rəqəm bu gün keçirilən MSK-nın iclasında açıqlanıb.

MSK sədri Məzahir Pənahov bildirib ki, onlardan 449 nəfərinin namizədliyini siyasi partiyalar irəli sürüb. Onun sözlərinə görə, 19 siyasi partiyadan yalnız 11-i namizəd irəli sürüb, 8 partiyadan hələlik namizəd müraciət etməyib.

Namizədlərin 5-i təşəbbüs qrupu, 752-i fərdi qaydada irəli sürülüb: “Ümumiyyətlə partiya mənsubiyəti olanların sayı 344 nəfərdir. Bugünədək 569 nəfərin namizədliyi təsdiq olunub. 439 nəfər imza vərəqi götürüb. Yəqin ki, bu günlərdə qeydiyyatla bağlı məlumatları ictimailəşdirəcəyik.

Bu rəqəmələr seçkiyə marağın nümunəsi kimi nəinki kifayətdir, hətta artıqlaması ilə kifayətdir. Bu rəqəm 1500-ü keçə bilər. Növbəti həftədən etibarən prosesin aktiv fazası başlayacaq”.