Məkkə İttifaqının ilk toplantısı İstanbulda baş tutacaq

Məkkə İttifaqı çərçivəsində Türkiyə, Pakistan və Səudiyyə Ərəbistanının iştirakı ilə ilk toplantı avqustun 31-də İstanbulda baş tutacaq. Toplantıda Türkiyənin xarici işlər naziri Hakan Fidan, Pakistanın xarici işlər naziri Məhəmməd İshaq Dar və Səudiyyə Ərəbistanının xarici işlər naziri Feysəl bin Fərhan Al Səud iştirak edəcək.

Minval.info xəbər verir ki, bu toplantı Məkkə Birgə Müdafiə Sazişi çərçivəsində həyata keçiriləcək fəaliyyətlərə strateji istiqamət vermək məqsədilə yaradılması nəzərdə tutulan Strateji Siyasi və Müdafiə Komitəsinin ilk iclası olacaq. Toplantıda beynəlxalq təhlükəsizlik məsələləri, müdafiə imkanlarının inkişafı, üç ölkənin silahlı qüvvələri arasında qarşılıqlı fəaliyyət qabiliyyətinin artırılması və müdafiə sənayesi sahəsində əməkdaşlığın dərinləşdirilməsi müzakirə olunacaq.

Bundan əlavə, terrorla mübarizə sahəsində birgə səylərin gücləndirilməsi, ittifaqın müəyyən edəcəyi ümumi fəaliyyət istiqamətləri üzrə işləri əlaqələndirəcək Katibliyin və digər mexanizmlərin fəaliyyət çərçivəsinin müəyyənləşdirilməsi planlaşdırılır. Toplantıda, həmçinin qarşıdakı dövrdə atılacaq addımlara dair yol xəritəsinin hazırlanması gözlənilir. Məkkə Birgə Müdafiə Sazişi regionda təhlükəsizlik, sülh və sabitliyin möhkəmləndirilməsinə yönələn imkanlar yaradır.