Koronavirusa yoluxan idmançı müalicədən sonra güzgüdə özünü tanımadı - FOTO

Koronavirusa yoluxan amerikalı idmançı üç həftə huşsuz vəziyyətdə qaldıqdan sonra ayılıb, güzgüyə baxanda isə özünü tanımayıb. Belə ki, 40 yaşlı ABŞ-lı idmançı Əhməd Ayəd müalicə müddətində 28 kq arıqlayıb, əzələləri isə tamamilə yoxa çıxıb.

İdmançı COVID-19-a yoluxana qədər boksla məşğul olub, marafonlarda iştirak edib.

Əhməd Ayəd mart ayında koronavirusa yoluxub. Cəmi dörd gün içində o, elə vəziyyətə düşüb ki, nəfəs almaqda belə çətinlik çəkib. Nəhayət, birtəhər xəstəxanaya gedib. Burada da onun vəziyyəti günü-gündən pisləşib, reanimasiyaya köçürülüb və ASV aparatına qoşulub.

Üç həftə komada qalan idmançı ayılanda 97 kq-dan 69 kq-a düşdüyünü və udqunma qabiliyyətini itirdiyini görüb.

Aparatdan ayılandan sonra o, əvvəlki görünüşünü qaytarmaq üçün əvvəlcə xəstəxana şəraitində, sonra isə evdə idmanla məşğul olmağa çalışıb. Ancaq düz bir ay istənilən fəaliyyət idmançıya təngnəfəslik yaradıb.

“Koronavirusa yüngül yanaşan insanlar məni narahat edir. Mən yoluxdum və sağaldım. Ancaq hələ də dəhşət içindəyəm”, – deyə Ayəd yaşadıqları barədə danışarkən vurğulayıb. (oxu.az)