İsraildə kritik seçki sonrası siyasi düyün: son vəziyyət

İsraildə çərşənbə axşamı keçirilən parlament seçkiləri rekord iştirakla yadda qaldı. Lakin heç bir siyasi qüvvə hökumət qurmaq üçün tələb olunan 61 mandatı əldə edə bilməyib. Bu səbəbdən müxtəlif açıqlamalar və ssenarilər ortaya atılır və ölkədə siyasi qeyri-müəyyənlik hökm sürür.

Minval.info xəbər verir ki, 7 oktyabr 2023-cü il tarixində Qəzza soyqırımının başladığı gündən sonra İsraildə keçirilən ilk seçkilərdə, hərbi qulluqçular, diplomatlar və məhkumlar kimi öz sandığında səs verə bilməyən seçicilərin “ikiqat zərf” adlanan səsləri istisna olmaqla, bütün səslərin sayımı tamamlanıb. Açılan sandıqlar ümumi səslərin təxminən 85 faizini təşkil edir.

7,3 milyon seçicinin 77 faizi seçkiyə qatılıb. İsrail Baş naziri Binyamin Netanyahunun rəhbərlik etdiyi iqtidar bloku 53, keçmiş Baş Qərargah rəisi Qadi Eyzinkotun başçılıq etdiyi müxalifət bloku isə 48 mandat qazanıb.

ƏLAQƏLİ

Bunu da oxu

Mahmud Abbasın Yunan Kiprinə səfəri: siyasi əlaqələrdə yeni dönüş

29.10.2026 - 16:14

Rekord qıran ərəb partiyaları kilid mövqedə

Rəsmi nəticələr hələ tam açıqlanmasa da, İsrail vətəndaşı olan fələstinliləri təmsil edən ərəb partiyaları rekord sayda mandat qazanaraq Məclisə 19 millət vəkili göndərib və bu səbəbdən də ittifaqların yaranmasında kilid mövqe tuturlar.

İsraildə 120 mandatlı parlamentdə hökumət qurmaq üçün ən azı 61 mandatlıq sadə çoxluğun əldə edilməsi şərtdir. Lakin hazırkı mənzərəyə əsasən, nə Netanyahu rəhbərliyindəki iqtidar bloku, nə də Eyzinkotun başçılıq etdiyi müxalifət bloku bu sayı əldə edə bilib. İki blokun koalisiya üçün kifayət qədər çoxluğa malik olmaması halında, seçkilərin yenilənməsi zəif ehtimal kimi görünsə də, Eyzinkotun ərəb partiyaları ilə koalisiya qurması və ya milli birlik hökuməti kimi üç ssenari önə çıxır.