Çernobıla hamı səfər edə biləcək: Prezident sərəncam imzaladı

Ukrayna prezidenti Vladimir Zelenski Çernobılı turistlər üçün açıq zona etmək qərarına gəlib. Dövlət başçısı yaşıl dəhliz yaradılması barədə sərəncam imzalayıb.

Bizimyol.info xəbər verir ki, Zelenski qadağaların olmayacağını deyib. Halbuki Çernobıla getmək hələ də təhlükəlidir.

Çernobıl Atom Elektrik Stansiyasındakı qəzadan 33 ildən çox vaxt keçir. Son illər bölgədə kiçik dəstələrlə turistlər görünməyə başlayıb. Ukrayna prezidentinin sərəncamından sonra böyük axın gözlənilir.

Zelenski özü stansiyaya gedib. Turistlər üçün yaşıl zona yaradılması ilə bağlı problem olmadığı qənaətinə gəlib. Buna qədər stansiyanın fotolarını çəkmək yasaq idi. Zelenski bütün qadağaları aradan qaldırıb.

Kiyevdən Çernobıla turist avtobusları 1,5 saata aparır. Hər gün yüzlərlə adam ora yola düşür. Əcnəbilərə Çernobıl zonasına getmək təxminən 100-150 dollara başa gəlir. Ukraynalılar uzağı 40-50 dollarından keçməlidir.

Şərtlər belədir ki, turistin yaşı 18-dən yuxarı olmalıdır. Geyimlərin qapalı olması tələb edilir. Şəxsi əşyaları torpağın üzərinə qoymaq olmaz. Nəsə yemək, qida baxımından nəsə toplamaq qadağandır. Ukrayna qanunvericiliyinə görə, Çernobıldan hətta moruq yığıb gətirmək cinayət məsuliyyəti daşıyır. Çünki bu, radioaktiv maddələrin daşınması anlamına gəlir.

Çernobılda qalmaq imkanları da var. Orada hətta otel, kafe də inşa edilib. Mütəxəssislər deyir ki, bütün qaydalara əməl olunsa, Çernobıla səfər təhlükəsizdir. Buna baxmayaraq, yenə də dünyada qəza zonasına gəlmək istəyən, amma radiasiyadan çəkinən milyonlarla insan var. Unutmayaq ki, oradakı Pripyat şəhərində 24 min il yaşamaq imkanı olmadığı bildirilir. İndi bu şəhərin küçələrində canavarlar dolaşır. Vəhşi heyvanlar qida üçün oranı münbit yer sayır.