Amerika Birləşmiş Ştatları Ticarət Nümayəndəliyi Fransanın Amerika texnologiya firmalarına rəqəmsal xidmət vergisi gətirməsinə qarşılıq verməyi və bu ölkədən idxal edilən 2,4 milyard dollar dəyərindəki məhsula 100 faizə çatan gömrük vergisi gətirməyi düşündüklərini açıqlayıb.

ABŞ Ticarət nümayəndəsi Robert Laythayzer verdiyi açıqlamada Fransanın bəzi Amerika texnologiya firmalarına gətirdiyi rəqəmsal xidmət vergisinin bu firmalara haqsızlıq olduğuna qərar verdiklərini açıqlayıb.

Laythayzer bu addıma qarşılıq verərək, Fransadan idxal edilən 2,4 milyard dollarlıq şampan, şərab, əl çantası, pendir və bəzi digər məhsullara 100 faizə çatan gömrük vergisi gətirməyi düşündüklərini və 6-7 yanvar tarixlərində mövzuyla əlaqədar iclaslar təşkil edəcəklərini ifadə edib.

Fransada vergidən təsirlənən şirkətlər arasında “Google”, Feysbuk, “Apple” və “Amazon” kimi texnologiya şirkətləri var.

ABŞ Fransanın tətbiq etdiyi verginin beynəlxalq vergi siyasətinə uyğun olmadığını iddia edib və ABŞ şirkətlərinə haqsız vergi gətirdiyinə görə istintaq başladıb. (Qazet.az)