Yaşlılar uşaqları ötüb: Dünya demoqrafik dönüşdədir

Dünyada ilk dəfə olaraq 65 yaş və yuxarı olan insanların sayı 5 yaşa qədər olan uşaqların sayını keçib. Bu dəyişiklik qlobal miqyasda doğum səviyyəsinin azalması və ömür uzunluğunun artması ilə əlaqədardır.

Minval.info xəbər verir ki, ABŞ Siyahıyaalma Bürosunun hesabatına əsasən, dünyada doğum göstəricilərinin azalması və yaşama müddətinin uzanması əmək qabiliyyətli əhali ilə yaşlı nəsil arasında formalaşmış demoqrafik balansı dəyişdirir. Proqnozlara görə, 65 yaşdan yuxarı vətəndaşların sayı 2025-ci ildəki 852 milyon nəfərdən 2060-cı ilə qədər 2 milyard nəfərə çatacaq. Həmin vaxta qədər Yer kürəsinin ümumi əhalisinin 10.23 milyard nəfər olacağı gözlənilir.

Hesabata görə, 2013-cü ildə dünya əhalisinin 45%-i doğum əmsalı təkrar istehsal səviyyəsində və ya ondan aşağı olan ölkələrdə yaşayırdı. Lakin cəmi 10 il sonra, 2023-cü ildə bu göstərici artaraq 71%-ə çatıb. Hazırda dünyanın ən çox əhalisi olan iki ölkəsi – Çin və Hindistanda doğum səviyyəsi təkrar istehsal həddindən aşağıdır. Banqladeş, Meksika və Vyetnam kimi digər çoxmilyonluq əhalisi olan dövlətlərdə də 2013-cü ildən etibarən doğum göstəriciləri bu kritik həddin altına düşüb.