Rusiya ordusunun nəhəng tank hücumu darmadağın edildi

Ukraynanın Donetsk vilayətinin Dobropolye istiqamətində Rusiya ordusunun genişmiqyaslı tank hücumunun qarşısının alındığı bildirilir.

Minval.info xəbər verir ki, bu barədə Ukrayna Silahlı Qüvvələri məlumat yayıb.

Məlumata görə, Rusiya ordusu son dövrlərin ən iri tank hücumlarından birini həyata keçirməyə cəhd göstərsə də, əməliyyat uğursuzluqla nəticələnib.

Ukrayna tərəfi iddia edir ki, döyüş zamanı 9 tank, 2 zirehli texnika, 3 “Qrad” yaylım atəş sistemi məhv edilib, həmçinin çoxsaylı Rusiya hərbçisi zərərsizləşdirilib.

Yayılan videogörüntülərdə Ukrayna dronlarının Rusiya zirehli texnikasını və motosikletlə hərəkət edən hərbçiləri hədəfə aldığı əks olunub.

Bundan əvvəl də eyni istiqamətdə Rusiyaya məxsus “Buk-M3” zenit-raket kompleksinin məhv edildiyi bildirilmişdi. Məlumata görə, həmin sistemin dəyəri təxminən 50 milyon dollar təşkil edir.

Dobropolye istiqaməti Donetsk vilayətinin şimal-qərbində, Slavyansk-Kramatorsk aqlomerasiyasının cənubunda yerləşir. Ukrayna tərəfindən səsləndirilən bu məlumatlar müstəqil mənbələr tərəfindən təsdiqlənməyib.