Qara dənizdə gərginlik artır: Rusiya Ukrayna yüklərini hədəfə aldı

Rusiya Silahlı Qüvvələri Qara dənizdə Ukrayna ordusu üçün yük daşıdığı iddia edilən üç quru yük gəmisinə zərbələr endirib. Bu barədə Rusiya Müdafiə Nazirliyi məlumat yayıb.

Minval.info xəbər verir ki, avqustun 6-sı axşam saatlarından 7-si səhərədək pilotsuz uçuş aparatları vasitəsilə həyata keçirilən hücumlar nəticəsində Ukrayna Silahlı Qüvvələrinin maraqlarına xidmət edən üç gəmi vurulub.

Rusiya Müdafiə Nazirliyi daha əvvəl də bu cür zərbələrin Ukrayna ordusuna silah, texnika və digər yüklərin daşınması imkanlarını əhəmiyyətli dərəcədə azaltdığını bildirmişdi. Digər tərəfdən, Ukrayna tərəfi Qara dəniz limanlarının blokadası səbəbindən kənd təsərrüfatı sektorunun bu il 1,5-3 milyard ABŞ dolları həcmində zərərə məruz qala biləcəyini açıqlayıb. İyulun 22-dən etibarən Böyük Odessa limanlarına gəmilərin girişinin dayanması ixrac və idxalda ciddi problemlər yaradıb.